Marneuli Bələdiyyə Məclisinin üzvü, “Milli Hərəkat”-ın liderlərindən biri olan Rəhim Əsgərov saxlanılıb.
Daxili İşlər Nazirliyinin məlumatına görə, o, rüşvət almaqda ittiham olunur.

“Daxili İşlər Nazirliyi rüşvət alma faktı ilə əlaqədar olaraq, Marneuli Bələdiyyə Məclisinin deputatı, “Vahid Milli Hərəkat”ın üzvünü saxlayıb.

Daxili İşlər Nazirliyinin Kvemo Kartli Polis Departamentinin əməkdaşları həyata keçirdikləri əməliyyat-istintaq tədbirləri nəticəsində Marneuli Bələdiyyə Məclisinin deputatı, “Vahid Milli Hərəkat”ın üzvü 1976-cı ildə anadan olmuş R. Ə.-ni hakimin hökmü əsasında saxlayıb.

Törədilmiş cinayətə görə 6 ildən 9 ilədək azadlıqdan məhrumetmə cəzası nəzərdə tutulur.

İstintaq nəticəsində müəyyən olmuşdur ki, Marneuli Bələdiyyə Məclisinin deputatı vətəndaş Ş.M.-ə 3000 lir qarşılığında dövlət strukturlarından birində işlə təmin olunmağı vəd edib. Ş.M. həmin məbləğin yarısını – 1500 larini əvvəlcədən, qalan hissəsini isə daha sonra verməli imiş.

Ş.M. və R.Ə. bu il 7 mart tarixində Marneulidə görüşüblər və Ş.M. Bələdiyyə Məclisinin deputatına 1500 lari verib, qalan məbləği isə 20 mart tarixində verib. Hüquq mühafizəçiləri R.Ə.-ni hakimin hökmü əsasında 28 mart tarixində Marneulidə saxlayıblar.

Rüşvət alma faktı ilə bağlı Gürcüstan Cinayət Məcəlləsinin 338-ci maddəsinin 1-ci hissəsi ilə istintaq aparılır”, – deyə DİN-in bəyanatında deyilir.