Marneuli meriyası 2023-cü il ərzində məktəbəqədər təhsil
müəssisələrinin fəaliyyəti üçün 4 700 000 lari xərcləməyi
planlaşdırır.
Proqramda qeyd olunduğuna görə, bələdiyyədə ümumilikdə məktəbəqədər
yaşda olan 3000 uşaq qeydiyyatdan keçib. Bələdiyyədə fəaliyyət
göstərən 14 uşaq bağçasında bugünkü vəziyyətdə 2749 uşağın qəbul
edilməsi mümkündür. Onlardan 1161 qız, 1373 oğlandır. 251 uşaq isə
müvafiq xidmətdən yararlana bilmir.
“Bələdiyyə ərazisində 14 bağça fəaliyyət göstərir. Onların
fəaliyyətini “Uşaq Bağçaları Birliyi” təmin edir. Ümumilikdə bütün
təhsil müəssisələrində 68-i müəllim, 68-i köməkçi olmaqla 350 nəfər
əməkdaş çalışır. Effektiv fəaliyyətin təmin edilməsi üçün
planlaşdırılır: Məktəbəqədər təhsil sahəsində idarəetmə siyasətinin
həyata keçirilməsi, standartlara uyğun olan təhsil
proqramı/metodologiyanın formalaşdırılması, Gürcüstan hökumətinin
sərəncamı ilə müəyyən edilmiş standartlara uyğun qida ilə təminat,
uşaqların təhlükəsizliyi məqsədi ilə uşaq bağçaları
infrastrukturunun (həyət, bina, inventar və s.) inkişaf
etdirilməsi. Uşaq bağçası heyətinin əmək şəraitinin
yaxşılaşdırılması və onların ixtisasının
yüksəldilməsi”, – məktəbəqədər təhsil müəssisələrinin
fəaliyyət proqramında qeyd olunub.
Qeyd edək ki, Marneuli bələdiyyəsinin büdcəsi Bələdiyyə Məclisinin
26 dekabr tarixində keçirilən iclasında təsdiq edilib. Yerli
özünüidarənin büdcəsi 46 856 300 lari müəyyən edilib və qanunverici
orqandan bildirdiklərinə görə, bu büdcənin yekun versiyasıdır,
mərkəzi büdcədən də pul gözləyirlər.