Mirzəyev və Hacıyev Cavaxetiyadan olan həmkarlarının büst açılışında iştirakı ilə bağlı gələn həftə izahat tələb edəcəklər
Marneulinin majoritar deputatı Ruslan Hacıyev
və Qardabaninin majoritar deputatı Savalan Mirzəyev 20 yanvar
tarixində Axalkalakinin kəndlərindən birində Qarabağ müharibəsi
iştirakçısının büstünün qoyulması məsələsinə münasibət
bildirdilər.
Ruslan Hacıyevin dediyinə görə, abidənin Axalkalaki meri və
Bələdiyyə Məclisi nümayəndələri tərəfindən açılması çox pis haldır.
Çünki Buğaşenidə büstü qoyulan Mixeil Avakyan separatistlər
tərəfindən vuruşurdu.
“Hesab edirəm ki, bu çox pis faktdır, çünki Gürcüstanın
Azərbaycanla çox yaxşı, strateji əlaqələri var və bu ölkə bizim
üçün çox yaxın və dost ölkədir. Məhz buna görə də hesab edirəm ki,
yerli özünüidarə belə addım atmamalı idi”, – Ruslan
Hacıyev deyir.
Baxmayaraq ki, büstün açılışında yerli özünüidarə nümayəndələri ilə
bərabər Parlamentin üzvləri Enzel Mkoyan və Samvel Manukyan da
iştirak edirdilər, Hacıyev deyir ki, Gürcüstan hakimiyyətinin,
Parlamentinin və hakim partiyasının mövqeyi onlardan fərqlidir.
“Ola bilsin ki, bu deputatların şəxsi düşüncəsidir, bilmirəm, deyə
bilmərəm. Lakin dəqiq bilirəm ki, şəxsən orada o büstün açılmasını
yanlış hesab edirəm. Bu Gürcüstan-Azərbaycan əlaqələrinə zərər vura
bilər”, – Ruslan Hacıyev bildirdi.
Hacıyev kimi Savalan Mirzəyev də Axalkalakidə Qarabağ müharibəsi
iştirakçısının büstünün qoyulmasını qınayır və deyir ki, bu faktı
dövlətin mövqeyi kimi qəbul etmək olmaz.
“Bunu bizim hakimiyyətin, iqtidar komandasının mövqeyi
kimi qəbul etmək olmaz. Çünki Gürcüstan hakimiyyəti hər zaman
Azərbaycanın ərazi bütövlüyünü dəstəkləyir”, –
Savalan Mirzəyev deyir.
Deputatlar öz həmkarları ilə görüşməyi və onlardan izahat almağı
düşünürlər. Mirzəyev deyir ki, Enzel Mkoyan və Samvel Manukyanla
bazar ertəsi və ya çərşənbə axşamı görüşməyi planlaşdırır.