İstefa verdikdən 3 həftə sonra Abazov merin “Facebook” səhifəsində yenidən fəallıq müşahidə olunub
Marneulinin
keçmiş meri rəsmi olaraq istefa verdikdən sonra “Temur Abazov
Marneuli meri” („თემურ აბაზოვი მარნეულის მერი“) Facebook
səhifəsində yenidən fəallıq müşahidə olunub.
Səhifədə yeni fəaliyyət bu gün qeydə alınıb. Belə ki, o, profil
fotosunu yeniləyib, yeni profil fotosu onun mer olduğu dövrdə
çəkilib.
Bunadək isə Facebook səhifəsində sonuncu yenilik 11 fevral
tarixində olmuşdu. O zaman da profil fotosu yenilənmişdi.
Qeyd edək ki, Temur Abazovun mer səlahiyyətləri dayandırıldıqdan
sonra da səhifədə fəal paylaşımlar olurdu və bu məsələ ilə bağlı
material da hazırlanmışdı. Lakin bu süjet radiomuzda efirə
getdikdən sonra həmin paylaşımlar silinmişdi.
Temur Abazov Marneuli meri vəzifəsində 8 ay qaldı. 14 iyun
tarixində Prokurorluq onu Marneuli sakini Elçin Allahverdiyevə
qarşı qeyri-insani və alçaldıcı rəftarda ittiham etmişdi.
Abazov barəsində yeddi ay müddətində həbs-qətimkan tədbiri
seçilmişdi. Məhkəmə onu dekabr ayında girov qarşılığında azadlığa
buraxmışdı. Vəkillərin dediyinə görə, prokurorluqda cinayəti onun
törətdiyinə dair dəlillər yoxdur və yalnız Elçin Allahverdiyevin
verdiyi ifadəyə əsaslanırlar.