Ötən gün, 6 sentyabr tarixində dairə seçki komissiyalarında
məntəqə seçki komissiyaları üzvlüyünə qeydiyyatın vaxtı başa
çatdı.
Marneuli Dairə Seçki Komissiyası miqyasında 90 məntəqədə 540 yerə
qəbul elan olunmuşdu.
Marneuli Dairə Seçki Komissiyasının sədri Koba Asanidzenin bizimlə
söhbəti zamanı dediyinə görə, elan olunmuş yerlərə 690 ərizə daxil
olub və komissiya üzvləri sentyabrın 8-dən 12-dək seçiləcək.
“İclasda hər məntəqəyə 6 nəfər seçiləcək. Müsabiqədə
iştirak edən şəxsin qalib gəlməsi üçün ən az 7 səs toplamalıdır.
Komissiya üzvləri namizədlər arasından seçki təcrübəsi və
peşəkarlıqlarına müvafiq olaraq seçiləcək” – deyə
Koba Asanidze bildirdi.
Koba Asanidze onu da dedi ki, 90 məntəqədən heç birində müsabiqə
ləğv olunmayıb və bu məntəqələrin
hər biri üçün minimum 6, maksimum
12 ərizə daxil olub.
Gürcüstan miqyasında 73 dairə seçki komissiyasına daxil olan 3 637
seçki məntəqəsində elan olunmuş 21 822 yerə 29 797 ərizə daxil
olub.
13 sentyabr tarixindən məsul 4 partiya tərəfindən seçki komissiyası
üzvlərinin təyinatına başlanılacaq. “Gürcü Arzusu” 3, “Avropalı
Gürcüstan”, “Vahid Milli Hərəkat” və “Gürcütan Vətənpərvərlər
Alyansı” isə hər biri 1 komissiya üzvü təyin edə biləcəklər.