Məktəbəqədər təhsil mərkəzlərində, uşaq bağçalarında və iaşə
obyektlərində üzvi tullantılar üçün zibil qabları qoyulacaq.
Marneuli “Üzvi Tullantıların Emalı Müəssisəsi”nə 30 zibil qutusu
verilib.
Zibil qutuları əsasən məktəbəqədər təhsil mərkəzlərində, uşaq
bağçalarında, iaşə obyektlərində və pilot variant olaraq Rustaveli
küçəsində yerləşən çoxmərtəbəli binalardan birində qoyulacaq.
Marneuli “Üzvi Tullantıların Emalı Müəssisəsi”nin rəhbəri İrakli
Burnadzenin bildirdiyinə görə, zibil qutuları üzvi tullantılar üçün
nəzərdə tutulacaq.
“Bu qablara yalnız üzvi tullantılar atılacaq. Hansı növ
tullantıların atıla biləcəyi üzərinə yazılacaq və düşünürük ki,
bununla da sakinlərin tullantıları çeşidləməsi daha da
asanlaşacaq” - dedi İrakli Burnadze.
Burnadze deyir ki, hər bir qabın həcmi 1 ton 100 kiloqramdır.
Hal-hazırda “Üzvi Tullantıların Emalı Müəssisəsi” üzərində hansı
növ tullantıların atıla biləcəyi yazılmış olan xüsusi etiketlərin
gəlməsini gözləyir. Bundan sonra isə zibil qabları seçilmiş
ərazilərə yerləşdiriləcək.
Zibil
qutuları “Üzvi Tullantıların Emalı Müəssisəsi”nə Avropa
İttifaqı Fondu layihəsi çərçivəsində verilib.