Azərbaycanla sülhün bərqərarına və münasibətlərin nizamlanmasına
kömək edə biləcək üç əsas prinsip razılaşdırılıb.
Bu barədə oktyabrın 30-da baş nazir Nikol Paşinyan Ermənistan
parlamentində bildirib.
Onun sözlərinə görə, tərəflər bu prinsiplərə əməl etsələr, sülh
müqaviləsinin imzalanması real olacaq.
"Birinci prinsip ondan ibarətdir ki, Ermənistan və Azərbaycan
bir-birinin ərazi bütövlüyünü tanımalıdır. Üstəlik, Ermənistan
ərazisinin 29800 kvadrat kilometr, Azərbaycanın isə 86600 kvadrat
kilometr olduğunu başa düşməklə", - Paşinyan
deyib.
İkinci prinsip odur ki, Alma-Ata bəyannaməsi dövlət sərhədinin
delimitasiyası və gələcək demarkasiyası üçün siyasi əsas
olmalıdır.
Üçüncü prinsip bütün regional kommunikasiyaların açılmasıdır. Bu,
suverenliyə, yurisdiksiyaya və qanunvericiliyə qarşılıqlı hörmət
prinsipləri əsasında baş verməlidir.
"Bizim planlarımıza Azərbaycanla sülhün və
münasibətlərin bərqərar olması haqqında sazişin imzalanması və
Türkiyə ilə münasibətlərin nizamlanması daxildir. Başa düşürük ki,
bu, asan olmayacaq, amma belə proqramın irəliləməsi Ermənistanın
dövlət maraqlarına uyğundur", - Paşinyan deyib.
Mənbə: turan.az