28 dekabr tarixində Türkiyənin Gürcüstandakı səfirinin dini işlər
üzrə müşaviri Əhməd Erdem Bütün Gürcüstan Müsəlmanları İdarəsinin
Şərqi Gürcüstan üzrə yeni müftisi Etibar Eminovla görüşüb.
Görüş Bütün Gürcüstan Müsəlmanları İdarəsinin mərkəzi ofisində baş
tutub.
Bu barədə məlumat Bütün Gürcüstan Müsəlmanları İdarəsinin
"Facebook" səhifəsində paylaşılıb.
Məlumata görə, Əhməd Erdem Etibar Eminovu yeni və məsuliyyətli
vəzifəyə seçilməsi münasibəti ilə təbrik edib. Müftiyə gələcəkdəki
dini işlərində müvəffəqiyyətlər arzu edib.
Həmçinin qonaq, gələcəkdə müfti və Müsəlmanlar İdarəsi ilə
əməkdaşlığın dərinləşməsinə hazır olduğunu bildirib.
Müfti Etibar Eminov da öz növbəsində təbrik üçün qonağa təşəkkür
edib və ikitərəfli əməkdaşlığın inkişafı üçün hazır olduğunu
bildirib.
Qeyd edək ki, 21 dekabr tarixində Bütün Gürcüstan Müsəlmanları
İdarəsinin Şərqi Gürcüstan üzrə yeni müftisinin seçilməsi üçün
növbədənkənar seçkilər keçirilib. Keçirilən seçkilərdə Ali Dini
Şuranın tam tərkibinin qərarı ilə Şərqi Gürcüstan üzrə yeni Müfti
vəzifəsinə Etibar Eminov seçilib. O, bu vəzifəni 5 il müddətinə
icra edəcək. Etibar Eminov bu günə qədər Bütün Gürcüstan
Müsəlmanları İdarəsinin Kvemo Kartli üzrə nümayəndəsi vəzifəsində
çalışırdı.
Onu da əlavə edək ki, 26 sentyabr tarixində Yasin Əliyev səhhətində
yaranan problemə görə müfti vəzifəsindən istefa etmişdi.