„როდის აშენდება ბათუმში ახალი მეჩეთი? როდის გასცემს ბათუმის მერია ახალი მეჩეთის მშენებლობის ნებართვას? ხალხი ლოცულობდა ამ წვიმაში გარეთ, ხალხმა დღეს ახალ მეჩეთშიც გარეთ ილოცა, ამ წვიმაში. რა დავაშავეთ მუსლიმებმა, რა დაგიშავეთ, რომ ერთი ფარატინა ფურცელი ვერ გაეცით?“ – ამ კითხვებით მიმართა აქტივისტმა ნესტან ანანიძემ ბათუმის მეჩეთში მუსლიმებისთვის რამადან ბაირამის მისალოცად მისულ აჭარის მთავრობის თავმჯდომარეს.

დღეს, 10 აპრილს, მუსლიმები რამადან ბაირამს აღნიშნავენ. ბათუმის ძველ მეჩეთში ლოცვის დასრულების შემდეგ ტრადიციულად მივიდნენ მთავრობის წევრები და მუსლიმებს მარხვის დასრულება მიულოცეს.

სწორედ მეჩეთში მივიდნენ სამოქალაქო აქტივისტებიც, რომლებმაც აჭარის მთავრობის თავმჯდომარეს ყველა ის კითხვა დაუსვეს, რაც ბოლო პერიოდში დაგროვდა. მათ შორის ადიგენის მოვლენებზეც.

„რა ცოდვა გვაქვს ქვეყნის წინაშე, რა საფრთხედ განგვიხილავთ, რომ ერთი ფარატინა ფურცელი ვერ გაეცით. ჩვენ არ გვჭირდება ეს რემონტი ხულოში, არ გვჭირდება უფასო ავტობუსები, ფეხითაც მოვიდოდით აქ. ჩვენ გვჭირდება ბათუმში ახალი, ღირსეული სალოცავი სივრცე. ქართველ მუსლიმებს ამ ქვეყანაში სჭირდებათ ღირსეული სალოცავი სივრცე და ღირსეული აღიარება,“ – ამ სიტყვებით მიმართა აქტივისტმა ნესტან ანანიძემ თორნიკე რიჟვაძეს.

„ადიგენთან დაკავშირებით რა ხდება ბატონო თორნიკე?“ – გაისმა მეჩეთში შეკრებილი მრევლიდან კითხვა.


„კარგი, კარგი“ – ასეთი იყო აჭარის მთავრობის თავმჯდომარის, თორნიკე რიჟვაძის პირველი რეაქცია.

თორნიკე რიჟვაძე ზოგადი პასუხებით შემოიფარგლა და ეცადა მწვავე კითხვებისთვის თავი აერიდებინა.

„პირველ რიგში ბაირამი მინდა მოგილოცოთ. მეტი მშვიდობა და ურთიერთპატივისცემა უნდა იყოს ერთმანეთის მიმართ. ამ ურთიერთპატივისცემის ფონზე გადაწყდება ყველა დაგროვილი საკითხი.

ახლა რაც შეეხება იმას, რომ ბევრი ხალხი მოდის ამ მეჩეთში, ეს კარგია და ღმერთმა გვიმრავლოს.

ასე ხდება სხვა სარწმუნოების სადღესასწაულო დღეებშიც. ეკლესიებში, სინაგოგებში, დღესასწაულებზე ძალიან ბევრი ხალხია.

ის საკითხი, რაც თქვენ დააყენეთ, აქტიურად ვმუშაობთ, რომ ის საკითხები დადებითად გადაწყდეს. ეს ჩხუბით, კამათით და გამოსვლებით არ გადაწყდება. ეს გადაწყდება ერთმანეთის სიყვარულით,“ – ასეთი იყო თორნიკე რიჟვაძის პასუხი აქტივისტის შეკითხვებზე.


„7 წელია ველოდებით. 7 წელია ველოდებით მშვიდად. ახალი მეჩეთი მუსლიმებს და ღირსეული უფლებები ქართველ მუსლიმებს. ყველაზე მშვიდობიანები არიან ქართველი მუსლიმები ამ ქვეყანაში,“ – უთხრა პასუხად ნესტან ანანიძემ.

„ცალკე დაგელაპარაკები. ბაირამს გილოცავთ,“ – ამ სიტყვებით დატოვა აჭარის მთავრობის თავმჯდომარემ მეჩეთი და მუსლიმი აქტივისტების კითხვებს აღარ უპასუხა.

მუსლიმი მრევლი წლებია ითხოვს ბათუმში ახალი მეჩეთის მშენებლობას. წლების გასვლის მიუხედავად მუსლიმებმა მეჩეთის აშენების ნებართვა ვერ მიიღეს.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.