Azərbaycanın Gürcüstandakı səfirliyi Polşanın Poznan şəhəri
yaxınlığında yol-nəqliyyat hadisəsi zamanı həyatını itirən
Gürcüstan vətəndaşlarının ailələrinə başsağlığı verir.
Bu barədə məlumat səfirliyin "Facebook" səhifəsində paylaşılıb.
"Polşanın Poznan şəhəri yaxınlığında baş vermiş
avtomobil qəzası nəticəsində həlak olan üç nəfər soydaşımızın
ailələrinə və yaxınlarına dərin hüznlə başsağlığı verir, səbir
diləyirik. Hadisə zamanı yaralananların tezliklə şəfa tapmasını
arzulayırıq", – Səfirliyin paylaşımında yazılıb.
Qeyd edək ki, Polşanın Poznan şəhəri yaxınlığında yol-nəqliyyat
hadisəsi zamanı 3 Gürcüstan vətəndaşı dünyasını dəyişib. Onlardan
iki nəfəri Marneulilidir – biri Baydar kənd sakini Könül
Balagözova, digəri isə 22 yaşlı Əzizkənd sakini Əli
Abdullayevdir.
Dünyasını dəyişən üçüncü şəxs isə Qardabani bələdiyyəsinin Birlik
kəndinin sakinidir.
Məlumata görə, hadisə 21 oktyabr tarixində saat 17:30 radələrində
mikroavtobusla yük maşınının toqquşması nəticəsində baş verib.
3 nəfərin ölümü ilə nəticələnən qəzada 5 nəfər ağır yaralanıb.
Xəsarət alanlar hadisədən dərhal sonra Polşanın Tibbi Hava
Xilasetmə Xidmətinə məxsus helikopter vasitəsi ilə Poznandakı
xəstəxanalara yerlerləşdiriliblər.