Qonşu bələdiyyələrin fərqli təcrübəsi – Bolnisi və Marneuli icma təşkilatları
18:11 / 10.02.2023
Gürcüstan miqyasında 3600 kənddən təxminən, 250-də icma mərkəzi
fəaliyyət göstərir.
İcma mərkəzlərinin əsas təyinatı yerli icmanın problemləri üzərində
işləmək və vətəndaşlarla özünüidarə arasında birmənalı
əlaqələndirici bənd yaratmaqdır. İcma mərkəzləri Marneuli və
Bolnisidə də fəaliyyət göstərir.
Baxmayaraq ki, Bolnisi və Marneuli qonşu rayonlardır, qeyd olunan
bələdiyyələrdə icma təşkilatlarının yaradılması, fəaliyyət
təcrübəsi bir-birindən ciddi fərqlənir.
2021-ci ildə Bolnisi yerli özünüidarəsi Bolnisi, Dmanisi,
Tetritskaro və Tsalka majoritar deputatı Qoqi Meşvelianinin
təşəbbüsü ilə 6 icma mərkəzi yaradıb. Bolnisi meriyasının
İctimaiyyətlə Əlaqələr Şöbəsindən “Marneuli” radiosuna icma
mərkəzlərində çəkiliş aparmağa icazə vermədilər və bizimlə yalnız
yazılı formada ünsiyyət qurmağa razılaşdılar. Bolnisi meriyasından
aldığımız rəsmi məlumata görə, icma mərkəzləri Bolnisi şəhəri,
Kazreti qəsəbəsi, Naxiduri (Arıxlı), Kvemo Bolnisi (Kəpənəkçi),
Talaveri (Faxralı) və Darbazda açılıb.
“İcma mərkəzlərində sağlam həyat tərzi, vətəndaşlığı
dərk etmənin yüksəldilməsi, təhsilin əhəmiyyəti, vacibliyi,
gənclərin dövlət quruculuğunda iştirakı və onun əhəmiyyətinin fəal
təşviqatı həyata keçirilir; Gənclər müxtəlif sosial tədbirlərdə
iştirak edirlər. Bu isə bizim etnik baxımdan rəngarəng olan
bələdiyyəmizdə gənclərin daha çox yaxınlaşması və ictimai həyata
qoşulmasına dəstək olur”, – Bolnisi meriyasının
“Marneuli” radiosuna göndərdiyi məktubda deyilir.
Bolnisi meriyasının icma mərkəzlərində çəkiliş aparmağımız və
onların fəaliyyətini yerində araşdırmağımızla bağlı etirazına
baxmayaraq, biz Bolnisi icma təşkilatlarının inkişafı üzrə işləyən
qeyri-hökumət təşkilatı “Vətəndaş bərabərliyi platformasının”
nümayəndəsindən müsahibə ala və Naxiduri icma-gənclər mərkəzində
keçirilmiş təlimdə iştirak edə bildik.
İndiki mərhələdə Bolnisi icma mərkəzlərinin maddi təminatını
bütünlükdə bələdiyyə həyata keçirir. Bolnisi meriyasından aldığımız
rəsmi məlumata görə, 2021-ci ildə müxtəlif təlimlərə, tədbirlərə,
inventar və texnikaya təxminən 14 000 lari xərclənib. 2022-ci ildə
majoritar deputat Qoqi Meşvelianinin təşəbbüsü ilə 4 icma
mərkəzində – Naxiduri, Talaveri, Kvemo Bolnisi və Darbazda gürcü
dili kursları açılıb. Kursların büdcəsi ümumilikdə, təxminən, 35 00
lari təşkil edib. Logistika və müxtəlif tədbirlərin təminatə üçün
təxminən 8000 lari xərclənib.
“İcmaların İnkişafı Mərkəzinin” üzvü Ana Marqvelaşvili hesab edir
ki, dövlət maliyyələşdirsə belə, kəndlərdə icma təşkilatlarının
olması mühümdür. Ancaq Marqvelaşvili dövlət tərəfindən təsis
edilmiş mərkəzlərlə bağlı problemlərdən də danışdı.
“İcma mərkəzi deməkdir ki, bu hamı üçün mərkəzdir. Onun
hansı siyasi ruhda olmasının, müxtəlif qruplara məxsusluğunun fərqi
yoxdur. Çünki əgər mən, bələdiyyə, icma mərkəzi təsis ediriksə, bu
deməkdir ki, mən oraya büdcənin pulunu qoyuram, büdcə isə
hamınındır. O zaman artıq xidmətlərin alınması baxımından heç bir
fərq olmamalıdır. Mən onu havadan gətirmirəm və bilirik ki, əksər
hallarda bu çox problemli məsələdir. Mən konkret olaraq Bolnisi
haqqında danışmayacağam. Amma dövlət tərəfindən yaradılmış
mərkəzlərdə bu problem həqiqətən var. Çünki biz siyasi mədəniyyəti
aşağı olan ölkəyik və mən yalnız açması mənə əlverişli olan qapını
aça bilərəm”.
İcma mərkəzlərinin yerli özünüidarə tərəfindən açıldığı Bolnisi
bələdiyyəsindən fərqli olaraq Marneuli bələdiyyəsində icma
mərkəzlərinin açılması kəndlərdə işləyən fəal vətəndaşların
təşəbbüsü və müxtəlif qeyri-hökumət təşkilatlarının maddi dəstəyi
ilə baş tutub. Marneuli yerli özünüidarəsi yerli icma
təşkilatlarının inkişafına az qoşulub. 2021-ci ildə müxtəlif
layihələrin maliyyələşdirildiyi yerli gənclər üçün müsabiqə
Marneuli Meriyasının icma təşkilatlarının inkişafı baxımından
həyata keçirdiyi nadir istisnadır. Analoji layihə 2022-ci ildə
həyata keçirilməyib. Meriyanın İctimaiyyətlə Əlaqələr Şöbəsindən
bizə bildirildiyinə görə, proqramın icrası prosesində nöqsanlar
aşkarlanıb və yalnız qeyd olunan çatışmazlıqlar aradan
qaldırıldıqdan sonra yeni müsabiqə elan olunacaq.
“Burada da biz iki istiqamətə baxmalıyıq. Mən ideyanın
özünü alqışlayıram və uzunmüddətli perspektivdə bələdiyyənin
layihələrin həyata keçirilməsi üçün müsabiqə elan etməsi təcrübəsi
çox yaxşı olacaq. Bizdə təhlükə yaranır və tənqid olur ki,
bələdiyyə qrant verməyə başlayanda onlar yalnız özlərininkini
maliyyələşdirəcəklər. Düzünü desəm, bu riskdir, amma mən yenə də
düşünürəm ki, başlamaq, yavaş-yavaş öyrənmək, tənqid etmək daha
yaxşıdır. Bunun üçün monitorinq rolunu oynayacaq və çağırışlardan
yüksək səslə danışa biləcək müstəqil media olmalıdır. Heç
başlamamaq və heç vaxt öyrənməməkdən bu yaxşıdır”, –
Ana Marqvelaşvili deyir.
Marqvelaşvilinin sözlərinə görə, icma təşkilatlarının azlıqların
məskunlaşdığı region və kəndlərdə olması mühümdür. “İcmaların
İnkişafı Mərkəzinin” üzvü Marneulidə fəaliyyət göstərən “Yeni
Düşüncə İnstitutunu” nümunə gətirir. Onun sözlərinə görə, bu
təşkilatın icmanın inkişafında böyük rolu var.
“Yeni Düşüncə İnstitutu” ümumilikdə 7 icma təşkilatını birləşdirir.
Altısı Marneulidə, biri isə Qardabanidədir. Yeni Düşüncə
İnstitutunun təsisçilərindən Kamran Əfəndiyev “Marneuli” radiosu
ilə söhbəti zamanı bildirdi ki, kəndlərdə icmanın inkişafı,
yerlərdə mövcud olan problemlərin düzgün, tez həll edilməsi üçün
icma təşkilatlarının fəaliyyət göstərməsi vacibdir.
“İcma mərkəzinin ilk təsisçisi Ariz Daşdəmirovdur.
2015-ci ildə Mollaoğlu kəndində təsis etdik və bu Kvemo Kartli
regionunda ilk icma mərkəzidir. İcma mərkəzlərinin kəndlərdə olması
çox mühümdür. Çünki kəndlər mərkəzdən çox uzaqda yerləşir. İctimai
nəqliyyat işləmir və əksər hallarda əhali xidmətdən yararlanmaq
üçün Marneuliyə gedə bilmir, birbaşa bizim yanımıza gəlirlər. Biz
kənd əhalisinə pulsuz xidmət göstəririk. Əhali əsasən ərizə yazmaq,
şəxsiyyət vəsiqəsinin surətini çıxarmaq, tərcümə üçün gəlir.
Həmçinin, burada internet var, kitablar var, yəni kənd əhalisinə
hərtərəfli xidmət göstəririk”.
Bir yerə toplaşmaq üçün məkandan başqa burada müxtəlif problemlərin
həllində dəstək almaq da mümkündür. “Yeni Düşüncə İnstitutu” başqa
istiqamətlərdə də işləyir ki, icmada olan problemləri həll etsin.
Kamran Əfəndiyevin sözlərinə görə, təşkilatın prioritet
istiqamətlərdindən biri qeyri-formal təhsildir.
“Kəndin problemlərinin səsləndirilməsi və təşviqatı
kampaniyalarının keçirilməsi də çox mühümdür. Yeni Düşüncə
İnstitutunun bu istiqamətdə çoxsaylı layihələri var. Bu layihələr
çərçivəsində yollara asfalt qatı çəkildi, küçə işıqları
quraşdırıldı, tullantılar problemi həll edildi, Xuldərə kəndində
park salındı və s. Bu baxımdan kənddə olan problemlərlə bağlı
tez-tez təşviqat kampaniyaları keçiririk. Bizim işlədiyimiz
dördüncü istiqamət isə qadınların gücləndirilməsidir. Çox uğurlu
qadınlarımız var. Onlar evdar xanım idilər və indi 30 qadın öz
biznesi ilə məşğuldur, yaxşı işlər görürlər. Ailənin, icmanın
inkişafına öz töhfələrini verirlər. Məhz buna görə, düşünürəm ki,
bütün icmalarda, bütün kəndlərdə icma təşkilatları olmalıdır. Bu
özünüidarə və kənd sakinləri arasında əlaqələndirici körpü
olmalıdır”.
“Yeni Düşüncə İnstitutu”-nun həmtəsisçisinin sözlərinə görə,
təşkilat gələcəkdə daha da böyüməyi və Bolnisi, Dmanisi,
Tetritskaro, Marneuli və Qardabaninin başqa kəndlərində də
mərkəzlər açmağı planlaşdırır.
Ana Marqvelaşvili “İcmaların İnkişafı Mərkəzi”-nin icma
təşkilatlarının sosial təsirinin müəyyən edilməsi üçün apardığı
araşdırmanın nəticələrindən də danışdı. Araşdırma 2021-2022-ci
illəri əhatə edir və göstərir ki, icma təşkilatı fəaliyyət göstərən
kəndlərdə əhalinin icma problemlərinin həlli işlərində iştirakı
nisbətən yüksəkdir.
“Mən istəyərdim ki, Gürcüstanda hər kənddə bir belə
qrup olsun. Bizim araşdırma 10 000 sakindən az əhalisi olan
məntəqələrlə bağlı idi və biz fokus qruplar aparanda onlar
deyirdilər ki, belə mərkəzlərin olmadığı qonşu kəndlər bizim kəndə
gəlirlər. Yerlərdə alternativ məkanın inkişaf etdirilməsi çox
mühümdür. Kənddə heç nə baş vermir deyə belə hallar həqiqətən
icmaya yaxşı təsir göstərir”.
Ana Marqvelaşvilinin sözlərinə görə, icma qruplarının yaradılması
kənddə yaşayan əhalinin yaşam tərzinin inkişafı və problemlərin
həlli məqsədi ilə olur. Problemlərin həlli isə hakimiyyət və yerli
özünüidarənin iştirakı olmadan çox mümkün deyil. Ana Marqvelaşvili
deyir ki, icma təşkilatlarının mübarizə aparmalı olduğu problemlər
məhz hakimiyyətin həll etməli olduğu problemlərdir. Amma dövlət
bəzi hallarda bu problemlərin müəyyən edilməsi və müvafiq
addımların atılmasını həyata keçirə bilmir.