Fars yeməkləri barədə videoları ilə tanınan iranlı aşpaz Navab İbrahimi azadlığa buraxılıb. Instagram-da 2.7 milyon izləyicisi olan aşpaz-bloqer yanvarın əvvəlində, kotlet resepti videosu paylaşandan sonra saxlanmışdı.

İranda siyasi fəaliyyəti izləyən HRANA agentliyi yanvarın 17-də bildirib ki, İbrahimi zaminə buraxılsa da, ona ittihamlar bəlli deyil.


22 yaşlı etirazçıya edam cəzası kəsilib
İranda İslam İnqilab Məhkəməsi 22 yaşlı etirazçı barəsində ölüm cəzası hökmü çıxarıb.

İranın Bəlucistan regionunda insan haqlarını monitorinq edən HAALVSH adlı qrup bildirir ki, Mənsur Dehmərde ölkənin cənubundakı Zahedan şəhərində keçirilən etiraz aksiyasında iştirak etdiyinə görə oktyabrın 3-də həbs olunub.

Fiziki əlilliyi olan Dehmərde məhkəmə iclasında deyib ki, o aksiya vaxtı “cəmi üç daş atıb və avtomobil təkəri yandırıb”.

Müttəhimin sözlərinə görə Zahedan Kəşfiyyat İdarəsinin düşərgəsində saxlandığı 10 gün ərzində ona işgəncələr verilib, burnu sındırılıb.

Dehmərde hazırda Zahedanın Mərkəzi Həbsxanasında saxlanır və ona ailəsi ilə görüşlər və telefon danışıqları qadağan olunub.

Ona qarşı şəriət qanunlarına uyğun olaraq irəli sürülmüş “Allaha qarşı müharibə” ittihamı ölüm cəzası nəzərdə tutur.

Bu, ölkədə artıq aylardır ki, davam edən etiraz iştirakçılarına qarşı daha çox irəli sürülən ittihamlardan biridir.

Tehran hakimiyyəti Sistan-Bəlucistan ostanının Zahedan şəhərində keçirilən etirazların iştirakçılarına amansız divan tutur.

Bəluc Fəallar Kampaniyası təşkilatı bildirir ki, son günlər Zahedanda yüzlərlə etnik bəluc həbs olunub.

Onlardan bir çoxunun vətəndaş kimliyi olmadığına görə qonşu Əfqanıstana deportasiya edilib.

Bu da qeyd olunur ki, Sistan-Bəlucistan ostanında minlərlə sənədisiz yaşayan iranlı var.

Məhz bu səbəbdən də onlar bir çox təməl insan haqlarından məhrum ediliblər.

Bəzi daxili mənbələr bu rəqəmin 100 mindən çox olduğunu bildirirlər.