მარნეულის მერიაში გარევაჭრობის აღკვეთის გზებზე მსჯელობენ

16:22 / 05.11.2019

მარნეულის ბაზრის მიმდებარე ტერიტორიაზე გარევაჭრობა კვლავ პრობლემად რჩება. მიუხედავად იმისა, რომ მარნეულის მერიის ზედამხედველობის სამსახურმა 2019 წლის 2 ივლისს გარევაჭრობა აკრძალა, რამდენიმე თვის შემდეგ ისევ შეამჩნევთ არაერთ კუსტარულად მოწყობილ დახლს, სადაც ძირითადად ყველი, ხაჭო, მაწონი და კვერცხი იყიდება. აქ რძის ნაწარმს მხოლოდ ვიზუალურად ამოწმებენ, თუმცა რა გასაკვირიც არ უნდა იყოს, მყიდველი ბევრი ჰყავთ. მოვაჭრეები ამბობენ, რომ ბაზრის შიდა ტერიტორიაზე გადასვლა მათთვის არამომგებიანია.

„რას ვყიდი იმდენს, რომ შიგნით 100 ლარი გადავიხადო? 10 შეფუთვა ხაჭო და 5 კილო ყველი მომაქვს გასაყიდად. ბაზრის შიდა ტერიტორიაზე რძის ნაწარმი ლაბორატორიულად უნდა შეამოწმონ, ქვითრისთვის ცალკე ფული უნდა გადავიხადოთ - მაგდენი ფული სად მაქვს მე.

„სამუშაო ადგილი არაა და იძულებული ვართ, აქ ვიყოთ. შიგნით რომ ვიყიდოთ ყველი და მერე გავყიდოთ, ამის ფული არ გვაქვს. პურის ფულს ვშოულობთ“.

„სახლში ჩემს გარდა არავინ მუშაობს და არავის მოაქვს ფული. იძულებული ვარ, აქ დავდგე და შვილები ვარჩინო. შიდა ბაზარში ქირის ფულს ითხოვენ და მაგდენის შესაძლებლობა არ მაქვს. მერე ელექტროენერგიაზე ცალკე ვიხდიდი 20 ლარს და საიდან მოვიტანო ამდენი? რაც უნდათ ის თქვან, მე იძულებული ვარ აქ დავდგე შვილებისთვის“, - ამბობენ გარემოვაჭრეები და კითხვაზე რძის ნაწარმი რომ მაღალი რისკის პროდუქტია და ლაბორატორიული შემოწმების გარდა აუცილებლად შესაბამის ტემპერატურულ რეჟიმზე უნდა ინახებოდეს პასუხის გაცემისგან თავს იკავებენ.

როგორც რადიო „მარნეულს“ მუნიციპალიტეტში უთხრეს, ზედამხედველობის სამსახური საქმის შესასწავლად ადგილზე უკვე იყო მისული. ამ ეტაპზე, მერია გარევაჭრობის მოგვარების გზებზე მსჯელობს. სავარაუდოდ , პრობლემის აღმოსაფხვრელად , სამართალდამცავი ორგანოების ჩარევა გახდება საჭირო.

ავტორი:

თეა დავაძე