მეოთხე წელია მარნეულის მუნიციპალიტეტის სოფელ ყიზილაჯლოს საბავშვო ბაღი დახურულია. სასწავლო პროცესი საგანმანათლებლო დაწესებულებაში პანდემიის პერიოდში, 2020 წელს შეწყდა. მას შემდეგ ბაღი მუდმივი რეაბილიტაციის პროცესშია. ჩაშლილი ტენდერები, დროში გაწელილი სამუშაოები - ამ ვითარებაში უწევთ ლოდნი ბაღის
აღმზრდელებსა და აღსაზრდელებს. ბაღის გახსნის შესახებ ინფორმაცია ბოლოს გასული წლის მაისს თვეში გავრცელდა.

მაშინ ბაგა ბაღების გაერთიანების ხელმძღვანელმა ზაურ ქარამოვმა გვითხრა, რომ სააღმზრდელო დაწესებულება გახსნისათვის ბოლო ეტაპებს გადიოდა, თუმცა ყიზილაჯლოს ბაღის გახსნა ახლა უკვე ეზოს კეთილმოწყობის სამუშაოებმა შეაჩერა. საბავშვო ბაგა-ბაღის დარჩენილი სამუშაოების და ბაგა-ბაღის ეზოს კეთილმოწყობის სამუშოების შესყიდვის ტენდერში გამარჯვებული კომპანიის გამოვლენა ადგილობრივმა თვითმმართველობამ მეოთხე ცდაზე შეძლო.

სამუშაოებს შპს “ელრაპი” 458`023 ლარად ასრულებს. რადიო “მარნეულმა” კომპანიის დირექტორს, პავლე მაღლაკელიძეს დაურეკა. როგორც მან ჩვენთან საუბარში აღნიშნა, ყიზილაჯლოში სარეაბილიტაციო სამუშაოები მარტის თვეში დასრულდება.

“თითქმის დასრულებულია. პატარ-პატარა რაღაცებია დარჩენილი. ძალიან მალე უნდა დასრულდეს - ამ თვეში აუცილებლად. ქვაფენილია დასაგები ამ ეტაპზე” - ამბობს კომპანიის დირექტორი.

ბაღის გახსნას სექტემბრისთვის ვარაუდობს მარნეულის ბაგა ბაღების ხელმძღვანელი ზაურ ქარამოვი და ამბობს, რომ აღსაზრდელების მიღება რეგისტრაციის გამოცხადების შემდეგ შეეძლებათ.

“ინვენტარი უკვე შესყიდულია. როდესაც სამუშაოები მორჩება შეგვეძლება ბავშვების მიღება. ვფიქრობ, რომ ახალ სასწავლო წელს გავხსნით. ამ სასწავლო წელს ვერ გავხსნით, ვინაიდან, ბავშვები დარეგისტრირებული არ არიან” - თქვა ქარამოვმა.

ქარამოვის თქმით, ის აღსაზრდელები ვინც ყიზილაჯლოს ბაღში დადიოდნენ ქალაქ მარნეულის N3 ბაღმა მიიღო. აღმზრდელები ამ წლების განმავლობაში პერიოდულად მუშაობდნენ. მაშინ, როდესაც ქალაქში არსებულ სააღმზრდელო დაწესებულებებს კადრების საჭიროება ჰქონდათ.


ამავე თემაზე: ყიზლაჯლოს ბაღის დასასრულებლად გამოცხადებული ტენდერი ვერც მესამე ცდაზე შედგა