Gürcüstan Süd Federasiyası süd məhsullarının etiketləşdirilməsini tələb edir
16:47 / 30.12.2022
Tsinstkaro kənd sakini Zeinab Abuladze süd məhsullarının
istehsalına evdə bir inəklə başlayıb.
2017-ci ildə “Mersi Corps” beynəlxalq təşkilatının köməyi və
İsveçrənin İnkişaf və Əməkdaşlıq Agentliyinin qrantı ilə ailə
fəaliyyətini biznesə çevirib. Kənddə müəssisə tikib və orada
yaşayan 12 ailənin əsas gəlir mənbəyinə çevrilib. “Tsintskaro+”
MMC-də süd məhsullarını yalnız çiy süddən hazırlayırlar.
“Gürcüstan Süd Federasiyası” 30-a yaxın çiy süd istehsal edən
müəssisəni özündə birləşdirir. Həmin süd istehsal edən
müəssisələrin məhsuluna “gürcü süd nişanı” vurulub. Kvemo Kartlidə
belə müəssisələrdən biri “Tsintskaro+”-dur. Zeinab Abuladzenin
sözlərinə görə, qeydiyyatdan keçirilmiş müəssisələr böyük problem
qarşısındadırlar. Onların əsas rəqibləri etiketsiz, şübhəli tərkibə
malik olan məhsullar satan istehsalçılardırlar. O, etiketli məhsul
satanların xərcinin daha çox olduğunu və bu halda məhsulun
qiymətinin də artdığını qeyd edir.
“Gürcüstan Süd Federasiyası vaxtında “etiket tələb et”
kampaniyasına başladı. Kampaniya çərçivəsində müştəri sadəcə
məhsulun tərkibi, onun mənşəyi və istifadə müddəti haqqında
məlumatlı olmalıdır. Qeydiyyatdan keçirilməmiş qurumlara nəzarət
olunsun, etiketsiz məhsul istehsal edən şəxslər isə cərimələnsin.
Elə hallar olub ki, bizim tərəfimizdən bəyənilməyən südü
qeydiyyatdan keçməmiş müəssisə götürüb. Onlar üçün südün keyfiyyəti
əsas deyil”, – Zeinab Abuladze deyir.
Gürcüstan Süd Federasiyasının nümayəndəsi Keti Ekizaşvili bildirir
ki, südün keyfiyyəti əsas problem olaraq qalmaqdadır. Lisenziyalı
müəssisə keyfiyyətsiz südü götürmür, amma əksər hallarda
lisenziyası olmayan qurumlar onu qəbul edir. Müvafiq olaraq,
fermerlərin keyfiyyətli süd istehsal etmək üçün motivasiyası ölür,
müştəri isə nəticə olaraq təhülkəli qida əldə etmiş olur.
“Milli Qida Agentliyi ilə də görüşdük, problemləri bildirdik. Amma
bazarlar yenə də indiyə kimi olduğu səviyyədə qalır”,
– Keti Ekizaşvili bildirdi.
Gürcüstan Süd Federasiyasının açıqlamasına görə, əgər Kənd
Təsərrüfatı Nazirliyi və Milli Qida Agentliyi etiketsiz süd
məhsullarına nəzarəti ciddiləşdirməsə, Federasiyada birləşmiş süd
istehsal edən müəssisələrə, 27 000 min fermerə təhlükə yaranacaq.
Həmin fermerlərin əksəriyyəti üçün süd istehsalı yeganə gəlir
mənbəyidir.
Federasiya məlumatlandırma kampaniyası elan edir. Burada müştəriyə
onun hüquqları və etiketsiz süd məhsullarından istifadənin
təhlükələri barədə məlumat veriləcək.
“Biz belə plan üzərində işləyirik - bazar girişlərində
“etiket tələb et” kimi loqolar yerləşdirək. Bu halda müştəri onun
hüquqlarının pozulmaması ehtiyacını başa düşsün və bütün süd
məhsullarında etiket tələb etsinlər”.
Marneulidə qeyri-müəyyən süd məhsulu istehsalçılarına çox rast gələ
bilərsiniz. Bazar ərazisində kustar qaydada düzəldilmiş çox sayda
piştaxta var. Burada əsasən pendir, kəsmik və qatıq satılır. Burada
süd məhsullarını yalnız vizual olaraq yoxlayırlar. Ancaq alıcılar
kifayət qədər çoxdur. Piştaxtaların ətrafında antisanitariya hökm
sürür. Süd məhsullarının temperatur rejiminə riayət olunmur.
Satıcıların əksəriyyəti etiketləşdirmə haqqında heç nə eşitməyib.
Bəzisi düşünür ki, kəndlinin məhsuluna etiket vurulmasını tələb
etmək qeyri-realdır. Bu yalnız məhsulun qiymətinin artmasına səbəb
olacaq və kəndlinin onsuz da az olan gəlirini azaldacaq. “Bura Marneulidir, etiket nə gəzir. Bəzisi evdən 10 kilo
pendir gətirir, ona kim etiket vuracaq? Zavod pendirinə görə
sənədlə möhürümüz var. Qalanını etiket olmadan satırıq, kəndli
etiketi haradan alsın. Həm də bu etiket baha başa gəlir, orada
qablaşdırma lazımdır, bu isə məhsulun qiymətini
artıracaq”, – özünüməşğul kişi deyir.
“Bu pendiri özümüz dağda hazırlayırıq. Etiketi yoxdur.
Şəxsi malımızdır, bunun nə etiketi olacaq. Bizim maldır və özümüz
hazırlayırıq, etiket lazım olduğunu bilmirik. Gətiririk, halal
malımızdır, satırıq”, – illərdir, bazarda pendir
satmaqla məşğul olan qadın bildirdi.
“Nə etiketi, kimə düzəltdirim? Gündəlik bazara da
gəlmirəm, nəyimə lazımdır? Baxın, təmiz düzəldirəm və çörək pulumu
qazanıram”, - daha bir özünüməşğul şəxs bildirdi.
“Milli Qida Agentliyi” əhaliyə məhsulun yararlılığını müəyyən
etməkdə kömək edəcək hansı əlavə ölçülər götürüləcəyini izah
etmir.
Qurumdan bildirdiklərinə görə, onlar yalnız aqrar bazarlarda süd
məhsullarını yoxlamaq öhdəliyi daşıyırlar və agentlik küçə
ticarətçilərinə nəzarət etmir.
Yerli özünüidarənin küçə ticarətçilərinə nəzarət etmək öhdəliyi
var. Marneuli meriyası özünüməşğulları bazar ərazsindən dəfələrlə
çıxarmağa cəhd göstərib. Ancaq maksimum bir həftəyə adi vəziyyət
geri qayıdır. Marneuli meriyasının Nəzarət Xidməti küçə ticarətini
qadağan etmək üçün yeni tədbirlər həyata keçirməyi planlaşdırır.
Bələdiyyənin Nəzarət Şöbəsinin rəhbəri Tural İsmayılovun
bildirdiyinə görə, onların xidməti yerində antisanitariya hallarına
görə cərimə yaza biləcək. Ancaq ona qədər məlumatlandırma
kampaniyası aparacaqlar.
Demək olar ki, meriya tərəfindən atılan addım yalnız küçə
ticarətini həll edə bilər, ancaq etiket məsələsi yenə də problem
olaraq qalır. Gürcüstan Süd Assosiasiyası öz gücü ilə
məlumatlandırma kampaniyaları aparmaqla problemin həllini
planlaşdırır. Onlar ümid edirlər ki, Milli Qida Agentliyi bu işdə
onlara kömək edəcək və nəzarət mexanizmlərini
ciddiləşdirəcəklər.