Rusiya prezidenti Vladimir Putin iyunun 29-da Vaqner özəl hərbi
şirkətinin təsisçisi Yevgeni Priqojin və onun komandirləri ilə
görüşüb.
Bu barədə məlumatı Putinin mətbuat katibi Dmitri Peskov verib.
Beləliklə bu barədə məlumatı daha əvvəl Qərb kəşfiyyatına istinadən
vermiş Fransa qəzeti Libération-un bu görüş barədə xəbəri təsdiq
olunub.
Peskovun sözlərinə görə görüşdə 35 nəfər iştirak edib,
görüş üç
saat çəkib.
“Prezidentin belə bir görüşü olub. O bu görüşə 35 nəfəri dəvət
edib. Görüşə bütün komandirlər və Priqojin də daxil şirkətin
rəhbərliyi dəvət olunmuşdu”.
Peskov qeyd edib ki, tərəflər görüşdə qiyamın nəticələrini müzakirə
ediblər, Putin baş verənlərə “qiymət verib”, komandirlərin
izahatlarını dinləyib və onlara bundan sonra işədüzəlmə və “döyüşdə
iştirak” barədə təkliflər verilib:
"Onlar vurğulayıblar ki, dövlətin və ali baş komandanın sadiq
tərəfdarları və əsgərləridirlər. Onlar habelə deyiblər ki, bundan
sonra da vətən uğrunda döyüşməyə hazırdırlar. Bu görüş haqqında
deyəcəklərimiz bu qədərdir”.
Libération yazmışdı ki, Priqojini iyulun 1-də Kremlə çağırıblar və
o orada Putinlə, habelə Rusiya qvardiyasının başçısı Viktor
Zolotovla və xarici kəşfiyyat xidmətinin rəhbəri Sergey Narışkinlə
görüşüb.
Bu da xəbər verilirdi ki, bu görüşə gedərkən Priqojini Vaqnerin
komandirləri müşayiət ediblər.
İyunun 23-də Vaqner özəl hərbi şirkətinin başçısı Yevgeni Priqojin
Rusiya Müdafiə Nazirliyini və Baş Qərargahını Ukrayna müharibəsində
səriştəsizlikdə ittiham etmiş və Moskvaya yürüşə başlamışdı.
Lakin iyunun 24-də gecə Vaqner və Rusiya rəhbərliyi arasında
Belarus lideri Alyaksandr Lukaşenkanın vasitəçiliyi ilə razılaşma
əldə olunduqdan sonra yürüş dayandırılıb.
Peskov onda demişdi ki, Priqojin Belarusa gedəcək. Lukaşenkanın
dediyinə görə o ən azı iyunun 27-də Belarusda olub. Lakin Lukaşenka
iyulun 6-da demişdi ki, Priqojin Belarusda yoxdur, vaqnerçilər isə
arxa cəbhədəki düşərgələrindədirlər.
İyunun 29-da Dövlət Duması müdafiə komitəsinin sədri Andrey
Kartapolov demişdi ki, Vaqner “xüsusi hərbi əməliyyatda” (Rusiya
Ukraynaya qarşı müharibəsini belə adlandırır-red) iştirak
etməyəcək, çünki Müdafiə Nazirliyi ilə müqavilə bağlamayıb.
İyulun 3-də Vaqner şirkətinə bağlı teleqram kanalları xəbər verirdi
ki, təşkilat muzdluların səfərbər edilməsini bir aylıq
dayandırıb.
İyunun 30-da məlum olmuşdu ki, Roskomnadzor Yevgeni Priqojinə bağlı
media qurumlarını – RIA FAN, “Politika Seqodnya” “Ekonomika
Seqodnya”, “Nevskiye novosti” və “Narodnıye novosti” saytlarını
bloklayıb.
Mash və Rotonda teleqram kanalları yazırdılar ki, Priqojin Patriot
media holdinqini və “troll fabriki” kimi tanınan İnternet
Araşdırmaları Agentliyini buraxıb.