ოპოზიციური პარტიების ნაწილში აცხადებენ, რომ საქართველოს პრეზიდენტის სალომე ზურაბიშვილის ინიციატივას უერთდებიან.

პარტიებში აცხადებენ, რომ ხელს მოაწერენ „ქართულ ქარტიას“, რომელიც ზურაბიშვილმა დღეს პროდასავლურ ოპოზიციურ პარტიებს შესთავაზა და იმ ნაბიჯებს მოიცავს, რომელიც მათ არჩევნებში გამარჯვების შემდეგ უნდა გადადგან.

“პრეზიდენტმა საზოგადოებას გააცნო გეგმა, რომელიც უზრუნველყოფს ქვეყნის ევროპულ მომავალს. ჩვენ შევუერთდებით ამ ქარტიას,” – აცხადებს „ლელოს“ დამფუძნებელი ბადრი ჯაფარიძე.

პრეზიდენტის ინიციატივას ასევე ეთანხმება „ევროპული საქართველოს ლიდერი გიგა ბოკერია და მიიჩნევს, რომ ყველა პასუხისმგებელი პოლიტიკური ძალა უნდა შეუერთდეს ამ გზავნილს:

„ძალიან დადებითად ვაფასებ სულისკვეთებას, მთავარ გზავნილს, ყველა დეტალი შეიძლება არ მესმოდა, რომ არ მკითხოთ, მაგრამ აპრიორი შემიძლია ვთქვა, რომ ჩემი პოლიტიკური გუნდის ნაცვლად ავტომატურად არასდროს ვსაუბრობ, მაგრამ ჩემი, როგორც ერთ-ერთი ლიდერის პოზიციაა, რომ ჩვენ და ყველა პასუხისმგებელი პოლიტიკური ძალა უნდა შეუერთდეს ამ გზავნილს“ — აცხადებს გიგა ბოკერია.

პრეზიდენტის ინიციატივას გამოეხმაურა „გირჩი“ და „დროა“. პარტიებში აცხადებენ, რომ მიესალმებიან საქართველოს პრეზიდენტის სალომე ზურაბიშვილის ინიციატივას, რომელიც ითვალისწინებს ევროკავშირთან მოლაპარაკებების გახსნისთვის აუცილებელი რეფორმების ერთიან ხედვაზე პარტიების შეთანხმებას და ხელს აწერენ “ქართულ ქარტიას”.

პოზიცია დააფიქსირა პარტია „ახალის“ თანადამფუძნებელმა ნიკა გვარამიამაც. მისი თქმით, სწორია პრინციპი და მიმართება საზოგადოების კონსოლიდაციის მცდელობისკენ:

„რაც შეეხება ტექსტს, ჩემთვის მიუღებელი მასში არაფერია. „ახალი“ ქარტიას ხელს მოაწერს“ — ამბობს ნიკა გვარამია.

„სტრატეგია აღმაშენებლის“ ლიდერი გიორგი ვაშაძე კი ამბობს, რომ დარწმუნებულია მოძებნიან საერთო ენას, რითაც შეუერთდებიან ამ პროცესს:

„დარწმუნებული ვარ, მოვძებნით საერთო ენას, რითაც შევუერთდებით ამ საერთო პროცესს. მე უფრო მეტ ერთობას ვისურვებდი“ — უთხრა გიორგი ვაშაძემ „ფორმულას“.

განცხადება გაავრცელა „ერთიანმა ნაციონალურმა მოძრაობამა“. პარტიაში აღნიშნავენ, რომ პრეზიდენტის ინიციატივას უერთდებიან:

„ერთიანი ნაციონალური მოძრაობა მიესალმება საქართველოს პრეზიდენტ სალომე ზურაბიშვილის ახალ ინიციატივას, რომლის მიზანსაც ევროკავშირში გაწევრიანებასთან დაკავშირებული გადასადგმელი ნაბიჯებისა და რეფორმების შესახებ პროდასავლური პარტიების საერთო ხედვის ჩამოყალიბება წარმოადგენს. შესაბამისად, “ერთიანი ნაციონალური მოძრაობა” უერთდება პრეზიდენტის მიერ ინიციირებულ ქართულ ქარტიას“ — აცხადებენ პარტიაში.

გამომდინარე იქიდან, რომ რამდენიმე პარტიას პოზიცია ჯერჯერობით არ დაუფიქსირებია, სტატია შესაძლოა განახლდეს.