Marneulinin 81 seçki məntəqəsindən 41-də seçkilər elektron qaydada keçiriləcək
25.03.2024
2024-cü ildə Gürcüstan miqyasında Parlament seçkiləri keçiriləcək.
Əksər məntəqələrdə seçki yeni formatda, elektron qaydada
keçiriləcək.
Gürcüstan Mərkəzi Seçki Komissiyası seçkilərin elektron
keçiriləcəyi məntəqələrin sayını artıq müəyyən edib.
Kvemo Kartli miqyasında ən çox seçki məntəqəsi Marneulidədir.
Marneulidə 81 seçki məntəqəsi fəaliyyət göstərir, Rustavidə 57,
Qardabanidə 53, Bolnisidə 52, Dmanisidə 50, Tsalkada 39,
Tetritskaroda isə 40 məntəqə var.
Marneuli miqyasında açılmış 81 seçki məntəqəsindən 41-də seçkilər
yeni formatda, elektron qaydada keçiriləcək. 40 məntəqədə seçki
prosesi köhnə qayda ilə keçiriləcək.
Gürcüstanda Parlament seçkiləri 2024-cü ilin 26 oktyabr tarixində
keçiriləcək. Seçkilər proporsional qaydada və 5%-lik baryer ilə baş
tutacaq. Bu deməkdir ki, bu il majoritar namizədlər seçkilərə
qeydiyyatdan keçə bilməyəcəklər. Partiyalar isə yalnız seçkiyə
gedən seçici səslərinin minimum 5%-ni toplasalar, mandat əldə edə
biləcəklər.
Yeni seçilmiş Parlament də öz növbəsində Gürcüstan tarixində ilk
dəfə prezident seçəcək. Salome Zurabişvili Gürcüstanın 5-ci və
birbaşa qaydada seçilmiş sonuncu prezidenti olacaq. Yeni
Parlamentin ilk iclasından sonra 45 gün ərzində prezident
seçiləcək. Prezidenti seçəcək 300 nəfər arasında Gürcüstan
Parlamenti və Abxaziya, Acarıstan Muxtar Respublikalarının Ali
Nümayəndəlik Orqanlarının bütün üzvləri, eləcə də MSK-nın müəyyən
etdiyi kvotalara uyğun olaraq yerli özünüidarənin nümayəndəlik
orqanları, Bələdiyyə Məclisləri, müvafiq siyasi partiya
nümayəndələri olacaqlar.